''मला देखील यामध्ये संशय वाटतो..'' मेटेंच्या पत्नीने सोडलं मौन

शिवसंग्राम पक्षाचे अध्यक्ष आणि माजी आमदार विनायक मेटे यांच्या निधनानंतर त्यांच्या अपघातामागे घातपात आहे का याची चौकशी करण्याची मागणी संघटनेच्या कार्यकर्त्यांकडून केली जात आहे. पण आता मेटे यांच्या पत्नी ज्योती मेटे यांनी देखील याबाबत आपले मौन सोडले आहे.

विनायक मेटे यांच्या अपघाता संदर्भात स्थानिक पत्रकार आणि विनायक मेटे यांचे ड्रायव्हर अण्णासाहेब मायकर यांचे एक कॉल रेकॉर्डींग व्हायरल झाले आहे. या कॉल रेकॉर्डिंगमुळे विनायक मेटे यांच्या जीवाला धोका होता आणि अपघातमागे घातपात आहे का, अशी चर्चा रंगली आहे. या पार्श्वभूमीवर विनायक मेटे यांच्या पत्नी ज्योती मेटे यांना पत्रकारांनी विचारले असता "ही क्लिप मी आत्ताच ऐकलेली आहे. अण्णासाहेब मायकर यांच्याशी माझे देखील बोलणं झाले आहे. त्यामुळे या एकूण प्रकाराची चौकशी झाली पाहिजे. तीन ऑगस्टला असाच प्रकार घडल्याचे देखील अण्णासाहेब यांनी सांगितले. त्यामुळे या संपूर्ण घटनेची सखोल चौकशी झाली पाहिजे, मला देखील यामध्ये संशय वाटतो आहे." असे स्पष्ट मत त्यांनी व्यक्त केले आहे.

विनायक मेटे यांचे मुंबई-पुणे एक्स्प्रेस वेवर अपघातात दरम्यान निधन झाल्यानंतर मराठा क्रांती मोर्चाच्या कार्यकर्त्यांनी यामागे घातपात असल्याचा आरोप केला होता. तर दुसरीकडे त्यांचे ड्रायव्हर अण्णासाहेब मायकर यांनीही ३ तारखेला विनायक मेटे यांच्या गाडीला घातपात करण्याचा प्रयत्न झाला होता, असा आरोप केला आहे. त्यामुळे विनायक मेटे यांच्यावर पाळत ठेवण्यात आली होती का, त्यांचा कुणी पाठलाग करत होते का आणि त्यांना घातपाताने मारण्यात आले का, असे अनेक प्रश्न उपस्थित झाले आहेत.

हे पण वाचा..

''मंत्रिपद द्यायचं नव्हतं पण लेकरू मारायचं नव्हतं'' मेटेंच्या आईचे आरोप कोणावर?

रविवार १४ ऑगस्ट रोजी पहाटे माजी आमदार शिवसंग्रामचे नेते विनायक मेटे यांचा अपघातात मृत्यू झाला. मराठा समाजाच्या बैठकीसाठी पुण्याहून मुंबईला येत असताना खोपोली बोगद्याजवळ त्यांच्या गाडीला अपघात झाला. डोक्याला जबर मार लगाल्याने त्यांचा जागीच मृत्यू झाला. विनायक मेटे यांच्या अपघाती निधनानंतर अनेक सवाल उपस्थित करण्यात आले आहेत. अनेकांना हा अपघात नसून घातपात असल्याची देखील शक्यता वर्तवली आहे. त्यांच्या कुटुंबियांनीच हा घात-पात तर नाही ना अशी शंका उपस्थित करीत चौकशीची मागणी केली आहे. त्याच्या आईने मंत्रिपद दिले नसते तरी चालले असते पण माझं लेकरू मारायचं नव्हतं अशी प्रतिक्रिया दिली. त्यांच्या आईने टीव्ही ९ या मराठी वृत्तवाहिनीशी बोलताना ही प्रतिकिया दिली आहे. त्यांच्या या प्रतीकियेनंतर त्यांचा हा आरोप नक्की कोणावर? विनायक मेटे यांना मंत्रिपद द्यावे लागेल म्हणून हा घातपात करण्यात आला आहे का? अशा अनेक चर्चा आता सुरु झाल्या आहेत.

विनायक मेटे यांचा अपघातात मृत्यू झाल्यानंतर त्यांच्या अपघाताची चौकशी करण्याची मागणी होत आहे. त्यांच्या कुटुंबियांनीच हा घात-पात तर नाही ना अशी शंका उपस्थित करीत चौकशीची मागणी केली आहे. मेटे यांच्या पत्नीने देखील अपघात कसा घडला कळलं पाहिजे. चौकशी व्हायला हवी, अशी मागणी केली आहे. त्यानंतर त्यांच्या आईने टीव्ही ९ या मराठी वृत्तवाहिनीशी बोलताना '' आमदारकी द्यायचं नव्हतं, मंत्रिपद द्यायचं नव्हतं पण त्यांनी माझं लेकरू मारायचं नव्हतं.'' असं म्हंटल आहे. विनायक मेटे यांच्या आईच्या या वक्तव्यानंतर अनेकांनी हा अपघात नेमका अपघात झाला कसा? अपघातानंतर रुग्णसेवेला एवढा उशीर का? मराठा आरक्षणाच्या बैठकीच्या वेळेत अचानक बदल कसा झाला? असे अनेक प्रश्न उपस्थित केले आहेत..